Category Archives: Veiði

Euro nymphing

By | Aðferðir, Nýjast1 | No Comments

Á ferðum mínum um alnetið datt ég niður á bandarískan vef þar sem talað var um Euro Nymphing. Þetta er kannski í sjálfu sér ekkert nýtt, er sama aðferðafræðin og sú tékkneska, veit þó ekki hvort útbúnaðurinn sé nákvæmlega sá sami. Mér fannst þetta áhugavert því ég hef aðeins verið að lesa mig til um Tenkara aðferðina en fannst hún takmörkuð að því leyti að línan/taumurinn er af fastri lengd og erfitt að taka fiska stærri en kannski tvö pund.

Í stuttu máli þá nota þeir langa létta flugustöng, gjarnan af þyngd 3-4 sem er 10 til 11 feta löng.
Eru svo með “Euro fly line” sem er þriðjungi grennri en venjuleg flugulína, þannig er hún líka léttari sem gerir það að línan sígur síður niður ef kastað er “langt” frá sér.
Framan á þessa línu er svo settur langur taumur sem er 18 til 22 feta langur, sjá uppskrift hér fyrir neðan.

Aðferðin gengur út á það að vera með þungar flugur og gjarnan 2-3, hnýttar sem viðhengi nema sú fremsta til þess að veiða samtímis á mismunandi dýpi. Það er aðeins talað um veiðar í ám með þessari aðferð. Veiðimaðurinn kastar út og heldur stönginni hátt, svokallaður “sighter” er litríkt girni á taumnum, því er haldið fyrir ofan vatnsyfirborðið og virkar sem tökuvari. Hann fylgir svo eftir línunni þegar hún rennur niður með ánni.
Það þarf að nota aðra kasttækni fyrir þennan búnað heldur en fyrir venjulegt flugukast, kasta línunni í boga undir stönginni, ekki yfir.

Hér er besti byrjendataumurinn að þeirra sögn:
42″ af .017 (20# maxima chameleon)
42″ af .015 (20# maxima chameleon)
42″ af .013 (12# amnesia)
42″ af .013-.014 Sighter
2mm tippet ring
4′-6′ af 4x-6x fluoracarbon tippet
2′-3′ af 4x-6x fluoracarbon tippet
Þetta gerir: 14 fet + 6-9 fet í heild

Nokkrir hlekkir
Búa til þennan taum: https://www.youtube.com/watch?v=zHnrURldXwI

Græjur og euro nymph veiðar: https://store.flyfishfood.com/fly-fishing-euro-nymphing-s/4612.htm

Baugstaðaós 12. október 2019

By | Nýjast1, Veiðiferðir, Veiðistaðir | No Comments

Við feðgarnir fórum okkar aðra ferð í Baugstaðaós núna í október.

Við fórum sem sagt líka í september í fyrra þó ég hafi ekki skrifað um þá ferð. Við vorum reyndar svo óheppnir þá að veðrið var það allra versta það sumarið, sunnan beljandi stormur 15 m/s ef ég man rétt.
Þar fyrir utan var kortið lélegt og við misskildum hvar ósinn var og fórum ekki í hann. Þó komu tveir fiskar á land.

Eftir að hafa talað við menn sem höfðu farið þarna nokkuð oft vissum við hvar mistökin lágu og hvar ósinn var og líka hver væri stysta leiðin að ósnum.
Ég hafði póstað á facebook og fengið nokkur svör um veiði á þessum tíma. Helstu svörin voru þau að það væri best að veiða í ánni sjálfri í kringum Baugsstaðarjómabúið gamla.
Við byjuðum að veiða um morguninn fyrir neðan veiðihúsið en þar sem það var ekki að gefa neitt færðum við okkur að rjómabúinu, þar var heldur ekki neitt að gerast.

Við vildum prófa ósinn, svona til að hafa prófað hann og vita hvernig landið lægi því við höfðum líka heyrt að sumir veiðimenn lægju allan daginn niðri í ós.
Lagt var hjá bænum Baugsstöðum og gengið þar niður í ós. Við vorum nokkuð snemma, um 3 tímum á undan flóði, auðvelt var að vaða álana sem voru rétt upp í kálfa. Þegar niður í ós var komið sáum við það sem kallað er fossinn og vissum því hvar sjálfur ósinn var. Við köstuðum í ósinn fyrir neðan foss á meðan við biðum eftir flóðinu. Gaman er að fylgjast með náttúrunni og sjá breytinguna á sjávarhæðinni þegar flæðir að. það var háflóð um 17:30. Eftir því sem hækkaði fluttum við okkur ofar í ánna og veiddum meðfram hraunkantinum sem þarna er en ekki kom neinn fiskur kominn á færið.

Nokkru seinna ákváðum við að fara til baka því það dimmdi um sjöleytið. Þá uppgötvuðum við að “það hafði flætt að”, já við uppgötvuðum að litlu álarnir virtust vera stórar ár núna. Það var ekkert annað að gera en að prófa að vaða yfir þá og við komumst auðvitað yfir þó talsvert væri hærra í þeim, munur á flóði og fjöru er 2,3,4 metrar, mismunandi eftir tunglstöðu. Þetta sýnir manni að maður þarf að þekkja inn á staðina en það kemur jú smá saman.
Þegar við vorum að taka saman áttum við gott og lærdómsríkt spjall við bónda sem kom til að forvitnast um hvaða vitleysingar hefðu keypt leyfi svona seint, það voru þó ekki hans orð.
Lærdómsrík ferð, næst verðum við að fara fyrr, verst er að allir góðu bitarnir eru farnir þegar leyfin fara á vefinn og verðið er ekkert lægra seinni partinn þó mun verri líkur séu á veiði á þeim tíma.

En góð ferð eins og allar veiðiferðir eru.

Hlíðarvatn 22-23 júní 2018

By | Nýjast1, Veiðiferðir, Veiðistaðir | No Comments

Hlíðarvatn aftur!
Já, alltaf gaman i Hlíðarvatni.

Maður stjórnar ekki náttúruöflunum, reyndar var frábært veður til veiða fyrri daginn, stillt, hlýtt og úrkomulaust, fallegt veður.
En það rigndi svo allan næsta dag og við vorum orðnir svolítið blautir og kaldir í lokin. Samt gaman.

Ekki var veiðin nú merkileg, einhverjir tittir fyrir framan Hlíð,  hús SVH  komudaginn á meðan grillið var að hitna. Ekki  svo  högg  fyrr en undir lokin í Hlíðarey, þar sem rúmlega punds bleikja tók píkokk. Það er reyndar ekki í fyrsta skipti  sem Hlíðarey bjargar veiðinni.

Það voru ekki margir  að veiða enda HM leikurinn fyrr  um daginn, daginn eftir sáum við svo bara einn  veiðimann, hvort sem það hefur verið rigningunni eða HM að kenna.

 

 

 

 

 

Hátíðardagur við Hlíðarvatn í Selvogi

By | Nýjast2, Veiðiferðir | No Comments

Félögin við Hlíðarvatn voru með opinn dag við vatnið þar sem allir gátu veitt frítt.

Ég skellti mér í góðu veiðiveðri, margt var um manninn, veiðimenn voru á öllum helstu veiðistöðunum í kringum allt vatnið. Ekki fara margar sögur af minni veiði, fékk tvo og sleppti öðrum.
Ég sá veiðimann vera með c.a. fjögurra punda bleikju og sýndist mér hann hafa bætt við annari stórri áður en hann fór.

Ég taldi gróflega veiðibók Hafnfirðinga, þar voru bókaðir um 45 fiskar í dag. Ekki slæmur afli það.

Ég tók nokkrar myndir læt þær fylgja með.

Hlíðarvatnsdagurinn 10. júní

By | Fréttir, Nýjast2, Veiðistaðir | No Comments

Hin árlegi Hlíðarvatnsdagur í Selvoginum verður sunnudaginn 10. júní. Þennan dag bjóða veiðifélögin við vatnið öllum sem vilja að veiða í vatninu á endurgjalds.

Félögin eru: Ármenn, Stangaveiðifélagið Stakkavík, Stangaveiðifélag Hafnarfjarðar, Stangaveiðifélag Selfoss og Árblik.

Gestum í Selvoginum verður heimil veiði frá morgni til um kl.17 þennan dag.

Veiðimenn eru hvattir til að koma við hjá einhverju félaganna, leita sér upplýsinga um fengsælustu staðina, flugurnar og skrá afla sinn í veiðibækur í lok dags.

Þrátt fyrir það sem kallað hefur verið óhagstæð tíð frá opnun í sumar, þá hafa aflabrögð verið með ágætum það sem af er og hátt í 700 fiskar færðir til bókar hjá félögunum við Hlíðarvatn.

Elliðavatn 21. maí 2018

By | Nýjast2, Veiðiferðir | No Comments

Fór í Elliðavatnið á annan í Hvítasunnu.

Fyrst fór í Hólmsá, prófaði að veiða mig niður að hylnum við Gunnarshólma.  Ég sá tvo aðra veiðimenn þarna sem er nú ekki algeng sjón.
Prófaði bara púpur, píkokk og Pheasant Tail, ekki fékk ég högg þarna og veit ekki hvernig hinum gekk.

Þá fór ég niður að Elliðavatni og  prófaði að kasta SV við Elliðavatnsbæinn, ég taldi allavega  10 veiðimenn víðsvegar um vatnið, einn fisk sá ég, hann hefur verið 3+ pund, tekinn á spún eða beitu.
Krían var í æti úti á vatni og ein og ein var farin að veiða nálægt mér sem  gaf mér  aukna von en annars var vatnið kalt.
Það fór á sama veg og áður,ég fékk ekki högg.

Þetta hlýtur að fara að koma, þ.e.a.s.veðrið, veit ekki með veiðina.

 

 

 

 

Skemmtilegur dagur í Elliðavatni

By | Nýjast2, Veiðiferðir | No Comments

Jæja, Elliðavatnið tók heldur betur skemmtilega á móti mér á opnunardaginn í gær

Ég byrjaði á því að fara út á Engin, þar var þá fyrir maður sem var búinn að spúna megin hluta af grjótinu sýndist mér. Þegar ég hitti á hann sagðist hann ekki hafa orðið var svo ekki leit þetta vel út.
Ég byrjaði að kasta í ós Bugðu án árangurs, óð svo út í grjótið á Engjunum, ég fékk ekki svo mikið sem högg og ekki var mikið líf að sjá. Ég var með Nobbler í nokkrum litum og einn nýjan í gylltum lit en ekkert gerðist.
Á endanum fannst mér þetta vera  vonlítið og sneri við. Í þrjósku og af gömlum vana henti ég aftur í Bugðu ós og var svona að ganga og draga inn þegar ég finn fyrir fyrirstöðu.
Viti menn á endanum var stór urriði sem heldur betur lét finna fyrir sér, hann tók hraustlega í línuna og stökk aftur og aftur, þetta var virkilega skemmtileg viðureign.
Að lokum náði í honum í pokann, þvílíkur fiskur, hraustlegur útlists sem mældist 4 pund eftir blóðgun þegar komið var í land, hann virkar samt stærri.

Þetta er líklega stærsti fiskur sem ég hefi fengið í vatninu, allavega hef ég ekki fengið stærri. Það sem gerði þetta svo enn skemmtilegra var að þetta var endurbætt útgáfa af flugunni Rósamunda sem ég hef sýnt hér áður á síðunni.
Sú fluga er straumfluga með grænum, rauðum og svörtum hárum, ég skipti út efstu hárunum sem eru svört og sett píkokk fjaðrir í staðinn og hafði þær langar, lengri en hinra.
Þetta virðist vera í tísku í laxaflugum þessa dagana, ég bætti svo aðeins við gylltu skrautþræðina. Þessa flugu kalla ég Rósamundu í sparifötunum.
Hún var reyndar með appelsínugulri keilu í þeirri útgáfu sem ég veiddi á núna.

Það var sem sagt tvöföld ánægja í þessari veiðiferð.

Ég prófaði einnig að veiða sunnan við Elliðavatnsbæinn með púpum en varð ekki var.

Ekki voru margir veiðimenn miðað við að þetta væri opnunardagur en samt slæðingur.

 

Og hérna var fiskurinn blessaður

Steinbrúin yfir á engin í Elliðavatni

By | Veiðistaðir | No Comments

Það er gaman að fræðast um þá staði sem maður veiðir á. Elliðavatn hefur verið mér lengi hugleikið enda stutt að fara frá höfðuðborgarsvæðinu. Einn af mörgum stöðum  sem mér finnst skemmtilegir í vatninu er “stígurinn” sem er framan við Elliðavatnsbæinn sem liggur S laga út  í vatnið til vesturs, veiðimenn nota hann í dag  til  þess að komast lengra út í vatnið. Þetta  er stígur sem notaður var til þess að fara á þurrum fótum frá bænum yfir á engin. Myndin sem fylgir hér er tekin á sarpur.is,  Menningarsögulegt gagnasafn. Ég hef oft leitað á vefnum  að myndum af  engjunum eða þessum stíg yfir á engin og nú hef ég sem sagt fundið mynd af stígnum.
Þetta voru flatir steinar sem lagðir voru niður og mynduðu stíg út á engin, það voru fimm meterslöng bil á stígnum sem brúuð voru með timbur brúm á sumrin,  þetta hefur eflaust verið gert svona til að koma í veg  fyrir að stígurinn sópaðist burt með ís á vetrum.
Þegar vatnið var stíflað 1924 eða þar um bil (hef séð margar dagsetningar varðandi gerð stíflunnar) hækkaði vatnið um einn meter, á þessari mynd  er því vatnsstaðan lægri en hún er í dag, einnig sést að byggt  hefur verið við bæinn, hann er ekki eins og hann er í dag.

http://sarpur.is/Adfang.aspx?AdfangID=631300

 

Loftmynd tekin af  map.is

gongustigur-yfir-a-engin