20.10.2019
2

Baugstaðaós 12. október 2019

By | Nýjast1, Veiðiferðir, Veiðistaðir | No Comments

Við feðgarnir fórum okkar aðra ferð í Baugstaðaós núna í október.

Við fórum sem sagt líka í september í fyrra þó ég hafi ekki skrifað um þá ferð. Við vorum reyndar svo óheppnir þá að veðrið var það allra versta það sumarið, sunnan beljandi stormur 15 m/s ef ég man rétt.
Þar fyrir utan var kortið lélegt og við misskildum hvar ósinn var og fórum ekki í hann. Þó komu tveir fiskar á land.

Eftir að hafa talað við menn sem höfðu farið þarna nokkuð oft vissum við hvar mistökin lágu og hvar ósinn var og líka hver væri stysta leiðin að ósnum.
Ég hafði póstað á facebook og fengið nokkur svör um veiði á þessum tíma. Helstu svörin voru þau að það væri best að veiða í ánni sjálfri í kringum Baugsstaðarjómabúið gamla.
Við byjuðum að veiða um morguninn fyrir neðan veiðihúsið en þar sem það var ekki að gefa neitt færðum við okkur að rjómabúinu, þar var heldur ekki neitt að gerast.

Við vildum prófa ósinn, svona til að hafa prófað hann og vita hvernig landið lægi því við höfðum líka heyrt að sumir veiðimenn lægju allan daginn niðri í ós.
Lagt var hjá bænum Baugsstöðum og gengið þar niður í ós. Við vorum nokkuð snemma, um 3 tímum á undan flóði, auðvelt var að vaða álana sem voru rétt upp í kálfa. Þegar niður í ós var komið sáum við það sem kallað er fossinn og vissum því hvar sjálfur ósinn var. Við köstuðum í ósinn fyrir neðan foss á meðan við biðum eftir flóðinu. Gaman er að fylgjast með náttúrunni og sjá breytinguna á sjávarhæðinni þegar flæðir að. það var háflóð um 17:30. Eftir því sem hækkaði fluttum við okkur ofar í ánna og veiddum meðfram hraunkantinum sem þarna er en ekki kom neinn fiskur kominn á færið.

Nokkru seinna ákváðum við að fara til baka því það dimmdi um sjöleytið. Þá uppgötvuðum við að “það hafði flætt að”, já við uppgötvuðum að litlu álarnir virtust vera stórar ár núna. Það var ekkert annað að gera en að prófa að vaða yfir þá og við komumst auðvitað yfir þó talsvert væri hærra í þeim, munur á flóði og fjöru er 2,3,4 metrar, mismunandi eftir tunglstöðu. Þetta sýnir manni að maður þarf að þekkja inn á staðina en það kemur jú smá saman.
Þegar við vorum að taka saman áttum við gott og lærdómsríkt spjall við bónda sem kom til að forvitnast um hvaða vitleysingar hefðu keypt leyfi svona seint, það voru þó ekki hans orð.
Lærdómsrík ferð, næst verðum við að fara fyrr, verst er að allir góðu bitarnir eru farnir þegar leyfin fara á vefinn og verðið er ekkert lægra seinni partinn þó mun verri líkur séu á veiði á þeim tíma.

En góð ferð eins og allar veiðiferðir eru.

24.06.2018
0

Hlíðarvatn 22-23 júní 2018

By | Nýjast1, Veiðiferðir, Veiðistaðir | No Comments

Hlíðarvatn aftur!
Já, alltaf gaman i Hlíðarvatni.

Maður stjórnar ekki náttúruöflunum, reyndar var frábært veður til veiða fyrri daginn, stillt, hlýtt og úrkomulaust, fallegt veður.
En það rigndi svo allan næsta dag og við vorum orðnir svolítið blautir og kaldir í lokin. Samt gaman.

Ekki var veiðin nú merkileg, einhverjir tittir fyrir framan Hlíð,  hús SVH  komudaginn á meðan grillið var að hitna. Ekki  svo  högg  fyrr en undir lokin í Hlíðarey, þar sem rúmlega punds bleikja tók píkokk. Það er reyndar ekki í fyrsta skipti  sem Hlíðarey bjargar veiðinni.

Það voru ekki margir  að veiða enda HM leikurinn fyrr  um daginn, daginn eftir sáum við svo bara einn  veiðimann, hvort sem það hefur verið rigningunni eða HM að kenna.

 

 

 

 

 

10.06.2018
0

Hátíðardagur við Hlíðarvatn í Selvogi

By | Nýjast2, Veiðiferðir | No Comments

Félögin við Hlíðarvatn voru með opinn dag við vatnið þar sem allir gátu veitt frítt.

Ég skellti mér í góðu veiðiveðri, margt var um manninn, veiðimenn voru á öllum helstu veiðistöðunum í kringum allt vatnið. Ekki fara margar sögur af minni veiði, fékk tvo og sleppti öðrum.
Ég sá veiðimann vera með c.a. fjögurra punda bleikju og sýndist mér hann hafa bætt við annari stórri áður en hann fór.

Ég taldi gróflega veiðibók Hafnfirðinga, þar voru bókaðir um 45 fiskar í dag. Ekki slæmur afli það.

Ég tók nokkrar myndir læt þær fylgja með.

22.05.2018
0

Elliðavatn 21. maí 2018

By | Nýjast2, Veiðiferðir | No Comments

Fór í Elliðavatnið á annan í Hvítasunnu.

Fyrst fór í Hólmsá, prófaði að veiða mig niður að hylnum við Gunnarshólma.  Ég sá tvo aðra veiðimenn þarna sem er nú ekki algeng sjón.
Prófaði bara púpur, píkokk og Pheasant Tail, ekki fékk ég högg þarna og veit ekki hvernig hinum gekk.

Þá fór ég niður að Elliðavatni og  prófaði að kasta SV við Elliðavatnsbæinn, ég taldi allavega  10 veiðimenn víðsvegar um vatnið, einn fisk sá ég, hann hefur verið 3+ pund, tekinn á spún eða beitu.
Krían var í æti úti á vatni og ein og ein var farin að veiða nálægt mér sem  gaf mér  aukna von en annars var vatnið kalt.
Það fór á sama veg og áður,ég fékk ekki högg.

Þetta hlýtur að fara að koma, þ.e.a.s.veðrið, veit ekki með veiðina.

 

 

 

 

20.04.2018
0

Skemmtilegur dagur í Elliðavatni

By | Nýjast2, Veiðiferðir | No Comments

Jæja, Elliðavatnið tók heldur betur skemmtilega á móti mér á opnunardaginn í gær

Ég byrjaði á því að fara út á Engin, þar var þá fyrir maður sem var búinn að spúna megin hluta af grjótinu sýndist mér. Þegar ég hitti á hann sagðist hann ekki hafa orðið var svo ekki leit þetta vel út.
Ég byrjaði að kasta í ós Bugðu án árangurs, óð svo út í grjótið á Engjunum, ég fékk ekki svo mikið sem högg og ekki var mikið líf að sjá. Ég var með Nobbler í nokkrum litum og einn nýjan í gylltum lit en ekkert gerðist.
Á endanum fannst mér þetta vera  vonlítið og sneri við. Í þrjósku og af gömlum vana henti ég aftur í Bugðu ós og var svona að ganga og draga inn þegar ég finn fyrir fyrirstöðu.
Viti menn á endanum var stór urriði sem heldur betur lét finna fyrir sér, hann tók hraustlega í línuna og stökk aftur og aftur, þetta var virkilega skemmtileg viðureign.
Að lokum náði í honum í pokann, þvílíkur fiskur, hraustlegur útlists sem mældist 4 pund eftir blóðgun þegar komið var í land, hann virkar samt stærri.

Þetta er líklega stærsti fiskur sem ég hefi fengið í vatninu, allavega hef ég ekki fengið stærri. Það sem gerði þetta svo enn skemmtilegra var að þetta var endurbætt útgáfa af flugunni Rósamunda sem ég hef sýnt hér áður á síðunni.
Sú fluga er straumfluga með grænum, rauðum og svörtum hárum, ég skipti út efstu hárunum sem eru svört og sett píkokk fjaðrir í staðinn og hafði þær langar, lengri en hinra.
Þetta virðist vera í tísku í laxaflugum þessa dagana, ég bætti svo aðeins við gylltu skrautþræðina. Þessa flugu kalla ég Rósamundu í sparifötunum.
Hún var reyndar með appelsínugulri keilu í þeirri útgáfu sem ég veiddi á núna.

Það var sem sagt tvöföld ánægja í þessari veiðiferð.

Ég prófaði einnig að veiða sunnan við Elliðavatnsbæinn með púpum en varð ekki var.

Ekki voru margir veiðimenn miðað við að þetta væri opnunardagur en samt slæðingur.

 

Og hérna var fiskurinn blessaður

02.09.2016
0

Tveir dagar í Hlíðarvatni í Selvogi

By | Veiði, Veiðiferðir, Veiðistaðir | One Comment

Er nýkominn úr tveggja daga veiði í Hlíðarvatn. Var að veiða frá 18 á sunnudegi til 16 á þriðjudegi.

Veðrið var þvílíkt fallegt á sunnudeginum þegar ég kom að vatninu, þvílík dýrð, ég hreinlega hélt að þetta gæti ekki staðist, einhver kæmi og ræki mig heim, þetta væru tóm misstök hjá mér.
Eftir að ég hafði komið mér fyrir í bústaðnum fór ég strax þar sem rennur úr vatninu við brúna. Þessi staður hafði gefið mér best þegar ég var þarna síðast um miðjan maí. Ekki fékk ég högg þarna og ekkert líf var að sjá. Ég sá svo seinna þegar ég skoðaði veiðibókina að ekkert hafði veiðst þarna lengi, hugsanlega er þetta bara vorveiðistaður. Ég endaði svo fyrsta kvöldið í Botnavíkinni og varð heldur ekki var.

Daginn eftir var veðrið áfram frábært, ég prófaði alla þessa helstu staði, Hlíðarey, Kaldós, Kaldós sker, Djúpanef og svo Botnavík, ég prófaði núna að veiða hana með hægsökkvandi línu. Einhvern vegin líkar mér aldrei við línur sem sökkva, finnst þær annað hvort of þungar og erfitt að vita hvenær búið er að draga þær nægilega inn til þess að kasta aftur. Eflaust er þetta spurning um þjálfun. Niðurstaðan var sú sama og kvöldið áður, fékk ekki fisk og varð varla var, ekkert líf að sjá.

Vel hefur veiðst í Hlíðarvatni í ár, Ármenn eru búnir að fylla eina veiðibók, á síðustu síðu hennar sá ég að alls voru skráðar 641 bleikja, 8 urriðar og 1 áll. Það var svo búið að skrá nokkrar síður í nýrri bók, hver síða með 25 línum!

Ég var ansi þreyttur eftir daginn og fór snemma í háttinn, ég vaknaði svo við rok og rigningu seinni daginn. Mér leist ekki á veðrið og fékk mér kaffi í rólegheitum og hlustaði á rás eitt. Ég gerði meira að segja nokkrar æfingar með morgunleikfiminni, í fyrsta skipti á æfinni. Sýnir hvað ég var lítið spenntur að fara út að veiða. Æfingarnar voru reyndar nokkuð góðar fyrir bakið á mér sem var frekar aumt eftir gærdaginn.
Ég fór svo beint í Botnavíkina enda voru allar færslur þaðan í veiðibókinni síðustu daga. Ekkert var að hafa í byrjun en par sem var að veiða innst í Botnlanganum fékk tvo fiska, þá færði ég mig nær þeim án þess að vera frekur. Stuttu seinna fór ég að fá tökur, þetta voru mjög nettar tökur, ég var ekki með tökuvara en þar sem ég kastaði beint undan vindi lagðist línan beint út og ég var alltaf í sambandi við hana. Það fór svo að ég náði þarna 5 bleikjum og missti tvær á 3-4 tímum. Ég endaði daginn svo í Hlíðarey án þess að verða var.

Minkur var að fara eftir bakkanum í leit að æti, nokkrar sögur hafa heyrst af sjálfsbjargarviðleitni hans. Ég settist á bakkann og hann kom mjög nálægt mér, svona stangarlengd í burtu. Ég var ekki alveg rór á meðan ég sat þarna, vissi ekki hvort hann væri að reyna að laumast í veiðipokann. Ég hafði rekist á þennan mink þegar ég var að keyra eftir veginum, hann kom lallandi eftir veginum  í áttina að  bílnum, ekki vitund hræddur, auðsjáanlega orðinn vanur manninum.

Góður veiðitúr var að baki sem sýnir að það er ekki veðrið sem stjórnar veiðinni….eða hvað?

 

 

19.08.2016
0

Veiðiferðir og veiðiferðir.

By | Veiðiferðir | 2 Comments

Ég er búinn að fara í nokkrar veiðiferði undanfarnar vikur.
Ég hef bara ekki nennt að skrifa um þær, líklega vegna þess að veiðin hefur ekki verið upp á marga fiska.

Fór í Elliðavatn með öðrum stráknum mínum fyrir nokkrum vikum, við vorum voða duglegir og óðum um Engin fram og til baka án þess að verða varir.
Enduðum svo á því að vaða út að gamla vatninu og þar fékk ég einn fisk.

Fór með gömlum vinnufélaga og syni hans í Framvötn. Ég hlakkaði mjög til því ég hafði ekki farið þarna áður. Ég hafði ekki treyst mér að fara þetta á mínum slyddujeppa, það kom svo í ljós að það er alger vitleysa því þarna var Suzuki Vitara og þá fer minn þetta alveg, kannski spurning um smá kafla upp að Ljótapolli.
Það kom mér á óvart hvað það var mikil umferð þarna, ég sá margar rútur keyra framhjá og marga túrista á jeppum.
Við fórum fyrst í Frostastaðavatn, hjá hrauninu. Þarna fékk ég 13 fiska en sleppti þeim öllum vegna stærðar.
Næst var farið í Ljótapoll, mér hafði verið sagt að nota þar sökklínu, ég tók því með mér sökklínu sem ég hafði keypt í Veiðihorninu (því sú gamla var svo leiðinleg) en mikið var nú leiðinlegt að kasta henni, ég braut svo toppinn á stönginni við löndun á fyrsta fiskinum. Menn eru ekkert að fara upp úr gígnum nema í lok dags en ég neyddist til þess, því auka toppurinn var uppi í bíl. Ég tók með mér aðra stöng með flotlínu sem ég ætlaði að prófa. Það fór svo þannig að ég notaði hana mest, mér finnst að það ætti alveg að duga að vera með intermediate línu þarna eða bara flotlínu, þetta var meira spurning um að kasta nógu langt út en að láta þetta sökkva svo mikið. Þegar upp var staðið var það spúnninn sem gaf mest, 12 fiska, ég var með 4 á fluguna.

Ég fór á “laxaslóðir” í Hólmsá og Elliðavatni með Skugga fyrr í þessari viku. Ekki sá ég lax við brúnna svo ég fór á stað í Hólmsá sem ég veit að geymir oft lax og endaði svo túrinn við Gunnarsholt í Hólmsánni. Þar var fyrir annar veiðimaður, þetta er jú orðinn þekktur staður, hann hafði ekki fengið neitt og eins fór fyrir mér.

Ég fór svo í Elliðavatn í gærkvöldi, frétti af stökkvandi laxi við brúnna og byrjaði því þar, því næst var farið út álinn og kastað í áttina að sefinu. Tvisvar var togað í línuna en ekki náði ég fiski. Veðrið var rosalega fallegt, logn og falleg kvöldsólin, gott fyrir sálina og stundum er það allt sem þarf.

Þar sem við hjónin erum aftur komin á tvo bíla, get ég spilað mína músík hátt á leiðinni og það var það sem ég gerði, núna var það Spotify sem sá um að streyma til mín rokki og róli.

Ég og strákurinn erum leita að einhverri nýjum veiðistað til að prófa, stað með einhverri tegund af laxfiski sem kostar ekki of mikið, 1-2 daga, ef menn geta mælt með einhverju þá er það vel þegið.